Республика Коми
Василий Сажин Василий Сажин Республика Коми 0

Лоас-ӧ водзӧсыс Трамплӧн Ким Чен Ынкӧд аддзысьлӧмысь?

Сингапурын нуӧдісны саммит США да Войвыв Корея костын. Кутшӧмкӧ арталана, результативнӧй помшуӧма кывкӧртӧдыс абу. Кырымалісны документ, коді сӧмын мода вылас ышӧдӧ водзӧ воськов вылӧ.

Позьӧ шуны, водзӧсыс абу. Унджык шедӧдіс Ким Чен Ын, тайӧ лои сійӧс легитимизируйтӧм, изоляция-йӧртӧдысь лэдзӧм сяма. Водзті лыддьыссис изгойӧн, а ӧні пыдди пуктана нырщик.

Ортсысяньыс видзӧдан та аддзан, тайӧ лӧсявтӧм партнеръяс костын йитӧд. Разнӧйӧсь, ӧтиас демократия, мӧдас тоталитаризм.

Тактика боксянь кӧ видзӧдлын,  водзӧссӧ перйис Войвыв Кореяса диктатор. США-са ворссис. Гашкӧ сетасны Дональд Трамплы мир нимӧдӧмысь Нобелевскӧй премия, но таысь некодлы сэсся бурыс абу.

Но юалӧм вылӧ; колӧ-ӧ вӧлі Трамплы лӧсьӧдны йитӧд Ким Чен Ынкӧд?, – век жӧ вочавидза: колӧ. Мыйла? Стратегия боксянь кӧ видзӧдлыны, воссьӧ ӧткымын позянлун. Мирас медся лёк пежгагыс – абу Войвыв Корея, абу Иран либӧ нӧшта кодкӧ, а Путин.

Мушарас абу ни ӧти канаса нырщик, коді эськӧ ыршасьӧ мирӧвой господство вылӧ, Путинысь кындзи. Ни Ким Чен Ын, ни Иранса аятолла, ни весиг Китай. Дерт, медвынаӧн лыддьыссьӧ США, но сэні президентъясыс вежласьӧны, оз пукавны трон вылас нэм помӧдзыс. Сӧмын Россияын Путин кутӧ кабыр улас помасьлытӧм, абсолютнӧй власть.

Коді медъёна угрожайтӧ демократическӧй мирлы? Коді сюйсьӧ бӧрйысян кампанияӧ, весиг США-ын, медым токны гӧлӧсуйтысьяслысь кывкӧртӧдсӧ? Дерт, оз Ким Чен Ын, а тайӧс вӧчӧ Москваса Кремльын медыджыд чина бандит.

Буретш тайӧ ӧти помка вӧсна ме ошка Дональд Трамплӧн Ким Чен Ынкӧд аддзысьлӧмсӧ.

Видзӧдласӧс подулалӧм могысь вайӧда нӧшта ӧти пасйӧд. Мӧд мирӧвӧй война дырйи рытыввывса демократияяс лӧсьӧдлісны каж кежся йитӧд тоталитарнӧй сталинскӧй режимкӧд, медым венны нӧшта лёкджык вӧрӧгӧс. Тайӧ «ёртасьӧмыс» сетіс водзӧссӧ.

Йитӧдыс кӧ тайӧ кык канан костас ёнмас, тайӧ лоӧ Кремльлӧн стратегическӧй ворссьӧм. Ӧд мый колӧ Путинлы? Сы колӧ, медым мир пасьтала Россияысь кындзи вӧлі кыдз позьӧ унджык кось, медым кыдз позьӧ унджыклаын олӧмыс торксис, вӧлі нелючки, нестабильность. Буретш та вылын и кутчысьӧ Россияса авторитарнӧй режим. Кымын ёнджыка дзугсьӧ мукӧдлаас, сымын кивывджык Путинлы.

Это личный блог. Текст мог быть написан в интересах автора или сторонних лиц. Редакция 7x7 не причастна к его созданию и может не разделять мнение автора. Регистрация блогов на 7x7 открыта для авторов различных взглядов.
Комментарии (0)
После авторизации, имя в ваших комментариях
станет ссылкой на вашу страницу в соц. сети,
и появится возможность ставить оценки.
или
Представьтесь!
Оставить комментарий
Авторизоваться для комментирования: