Сыктывкарын котыртісны пикет, кӧні дивитісны Коми Республикаса Юралысь Сергей Гапликовӧс.Весиг сёрни абу, унатор боксянь пикетчикъяс правӧсь. Тырмытӧмторйыс Гапликолӧн абу этша.
Но некыдз ог вермы ӧткывъясьны акция вылӧ петалысьяскӧд. Найӧ чайтӧны, колӧ пӧ сӧмын вежны меставывса властьӧс и ставыс лоӧ лючки-ладнӧ. Оз татшӧмыс ло. Россия – чорыда централизуйтӧм империя, кӧнӧ ставыс урчитсьӧ да вӧчсьӧ шӧринын, шӧр властьӧн.
Да, позьӧ вежны меставывса властьӧс, позьӧ мӧдӧдны отставкаӧ Сергей Гапликовӧс. кыдзи мӧдӧдісны воддза веськӧдлысьсӧ. Сергей Анатольевич местаӧ локтас выль морт. И сылы паныд сідзжӧ ковмас пикетъяс сувтӧдны. Нинӧм оз вежсьы, сы вӧсны мый меставывса власть, тшӧтш и регионса нинӧм оз решайт. Колямӧй потӧм вор дорӧ.
Мыйта кӧть эн веж меставывса, региональнӧй веськӧдлысьясӧс, нинӧм оз вежсьы. Любӧй веськӧдлысь кутас видзӧдны оз йӧзлӧн интересъяс вылӧ, а сы вылӧ, мый кӧсйӧ Кремль. Став тайӧ зільӧмыс, эбӧсыс вошас весьшӧрӧ. Выль веськӧдлысь ваяс выль проблемаяс, выль сьӧкыдлунъяс. Идеальнӧй веськӧдлысьыс оз вермы лоны. Вежны колӧ системасӧ, коді мед суйӧраліс власть органъяслысь ыджыдалӧмсӧ. А вежны ӧтиӧс мӧд выло – тайӧ кыдз ӧти шусьӧгын вежны шыла майтӧг вылӧ.
И нӧшта ӧтитор: миян власть сетіс кӧ нуӧдны пикетсӧ, тайӧ висьталӧ сы йылысь, мый сійӧ абу авторитарнӧй.
Видлӧй нуӧдны Путинлы паныд митинг. Мый тіянӧс виччысьӧ? Ӧдйӧ кватитас ОМОН да пуксьӧдас автозакӧ. Сӧдтӧд дубинкаӧн пасьйӧдлас-кучкалас. Тайӧ ясыда висьталӧ, коді эи коді.
Дерт жӧ, Гапликов абу демократ. Но абу и диктатор. Диктатура дырйи вермасны ӧмӧй йӧз петны протест акция вылӧ? Оз. Сідзкӧ Гапликов абу диктатор, а Путин – тайӧ антидемократ, диктатор да фюрер!
Нинӧм оз вежсьы, кытчӧдз оз ло вежӧма шӧр властьсӧ, а шӧр властьыс – тайӧ Путин.
